वारसास्थळांच्या दिनदर्शिकेत ताजमहालचा समावेश

2018 वर्षासाठी योगी सरकारने ऐतिहासिक वारसास्थळांचा उल्लेख असणारी दिनदर्शिका प्रसिद्ध केली. यात ताजमहालला स्थान देण्यात आले. दिनदर्शिकेवर पंतप्रधान नरेंद्र मोदी आणि मुख्यमंत्री योगी आदित्यनाथ यांचे छायाचित्र छापण्यात आले. दिनदर्शिकेवर भाजपची ‘सबका साथ, सबका विकास’ ही घोषणा नमूद आहे. या अगोदर राज्याच्या पर्यटन विभागाने काढलेल्या पुस्तिकेत ताजमहालला स्थान न मिळाल्याने वाद निर्माण झाला होता. ऐतिहासिक वारसास्थळांच्या दिनदर्शिकेत गोरखनाथ मंदिराला देखील स्थान मिळाले. काशी विश्वनाथ मंदिर, विंध्याचल, मथुरा येथील होळी, कृष्ण जन्मस्थान, झाशीतील किल्ला, सारनाथ, अयोध्येची राम की पैडी, त्रिवेणी संगम आणि पीलीभीत येथील गुरुद्वारा यांचा दिनदर्शिकेत समावेश करण्यात आला. संगीत सोम यांच्या ताजमहाल विषयक वक्तव्यामुळे मोठा वाद निर्माण झाला. सोम यांच्या वक्तव्याला खोडून काढत मुख्यमंत्री योगींनी ताजमहालवर भारतीयांना गर्व असल्याचे म्हटले होते.